Z Janšojc/Jänschwalde. W našej źiśowni „Lutki“ w Janšojcach smy ptaškowu swajźbu z wjele radosću a angažementom swěśili. Pśed tym su se źiśi intensiwnje na toś ten wósebny źeń pśigótowali. Su pilnje spiwali, baseń zwucowali a kužde pśedšulske góle jo swóju rolu w swajźbaŕstwje dostało. Pónjeźele, 26. januara, jo było skóńcnje tak daloko. Něźi 15 starjejšych a starych starjejšych jo ako gósći pśišło a napněśe cakało na zachopjeńk swěźenja. Źiśi z góletkownje su se južo do z lubosću wugótowanego „gnězda“ gněśili.

Póbratš jo wótwórił swětosnosć a jo wšyknych pśibytnych pówitał. K wjasołej muzice su zaśěgnuli źiśi a smy zgromadnje spiwali někotare štucki znatego spiwa „Ein Vogel wollte Hochzeit machen…“, se wě teke w serbskej rěcy.