Z Města/Cottbus. Zachadny stwórtk su chóśebuske drogi połne dolnoserbskich spiwow, drastwow a rejow byli. Abiturny lětnik Dolnoserbskego gymnaziuma ga jo swój 39. zapust swěśił. Pśigótowanja za toś ten highlight šulskeje kariery su južo w zachadnem lěśe se zachopili. Za to su se 22 pórikow a tśi zastupnikojske póriki wěcej razow zmakali a zgromadnje z rejowańskima ceptarjoma Berit Šydlowa (Schiedlo) a Thomas Mieth reje nazwucowali, ale teke źaržanje śěła a wutrajnosć a to pśecej až do pózdźejšych góźinow pó šuli. Ale toś ta proca jo se zadaniła. W slědnem tyźenju januara su mógali wukniki a wuknice se wupóraś a to žywe serbstwo w měsće pokazaś.