Jadnab 30 luźi jo se wobźěliło na rozgronje wó projekśe SROKA. Mjazy nimi jo było wjele Serbow, teke gjarstka drugich zajmcow. Foto: Hanka Rjenšojc 
Z Města/Cottbus. W ramiku dialogowego formata „Gesprächsbereit“ jo wobydlaŕski region Łužyca (Bürgerregion Lausitz) organizěrował wjacor z titelom „Serbsku rěc nowo nadejś“, ga 26. januara. W srjejźišću jo stojało pśedstajenje projekta SROKA za wóžywjenje serbskeje rěcy w Dolnej Łužycy.
Saskia Bugajowa ako powědaŕka cesnoamtskeje strategiskeje kupki za wuźěłanje rěcneje strategije a Sophie Rädelowa wót projektowego teama SROKA na Serbskem instituśe w měsće stej wótegroniłej na pšašanja moderatorki a publikuma. Wósebnje jo se na to pokazało, kak stej se ze serbskeju rěcu zwězałej, lěcrownož njejstej direktnje z njeju wótrosłej.
