Z Města/Cottbus. Wałtoru, 27. januara, jo było wóspjet kazane do Serbskego muzeuma na stawne blido kołowokoło Miny Witkojc. Pópšawem jo dejało to grono byś wó basnjenju a pśijaśelstwje Miny Witkojc a Marjany Domaškojc. Ale chórosći referentki dla jo dejała iniciatorka rozgronoweje rundy, Stefanie Krawcojc, improwizěrowaś a k pomocy jo jej była kuratorka muzeja, Christina Kliemowa. Nejpjerwjej raz su se pśibytne gósći pśedstajili. Wjele z nich ga jo se južo znało wót pjerwjejšnych zmakanjow, na kótarychž su wuměnili informacije a spomnjeśa wó serbskej basnikaŕce a casnikaŕce. Cogodla se schaduju? Te jadne se zajmuju za region a su měnjece, až to serbske k tomu słuša, a wjele z nich ma serbske kórjenje. Druge su rozpalone za basni a publicistiku serbskeje poetki, abo su samo wědomnostnje slěźili za jeje twórjenim a žywjenim.