Ze Žarowa/Sorau w pólskej Łužycy. Prědk gód su tudy pśi šoseji do Žemrja stajili toflu, źož to mě Dolneje Łužyce jo napisane w serbskej rěcy. To jo drogowe turistiske znamje E22a (za wustajenim pólskego ministaŕstwa za infrastrukturu). Take znamjenja su myslone ako drogupokazowarje k wósebnym turistiskim cilam.

To jo za našym wěźenim prědna taka oficielna tofla ze serbskim napismom w Pólskej, a wóna jo wordowała stajona na iniciatiwu Zwěstka Serbow w Pólskej (jich połne mě w pólskej rěcy zni: Związek Łużyczan w Polsce – Macierz Łużycka).

Na tofli stoj napismo „Trakt Dolne Łużyce – Dolna Łužyca“, a to jo mě turistiskeje awtoweje ruty, ako dej wjasć prěki pśez pólski źěł Dolneje Łužyce wót nimskeje granice pla Baršća pśez Brody, Žemŕ až do Žarowa. (To słowo „trakt“ měni na pólske historisku abo wikowaŕsku drogu abo šoseju.) Pódla napisma jo namólowany byk, wopon Dolneje Łužyce.