Zajmowany som cytał komentar Wernera Meškanka w pśedslědnem wudaśu Nowego Casnika. Wón jo skjaržył na problemy našogo casa: škódne emisije, wójna, wuklukowanje zemje. „Take se demokratiju a lichotu źe pśedstajili njejsmy, ako smy 1990 socializm DDR dali pśeměniś zasej na kapitalizm“, wón jo tam pisał. A som se pšašał, jo DDR w toś tom nastupanju napšawdu lěpša była nježli źinsajšny kapitalizm? Zawěsće nic: Brunica, chemijowe kombinaty, zanjeroźone rěki, znicone krajiny – DDR jo słušała k nejgóršym statam Europy. Militarizacija jo se zachopiła južo w źiśowni, ja som tam teke z małymi pancerami grał. Mě se zda, njesmjejomy se pšašaś, jo było pjerwjej lěpjej abo jo źinsajšny swět perfektny. Ale skerjej, kak móžomy źinsa, za wšyknych, swět pólěpšyś? Slědk glědaś na zakopowane systemy nam njepomaga.