Ze Smogorjowa/Schmogrow. Mjaztym až Błota su byli wupśimjone wót sněga a lodowatych temperaturow, stej pšosyłej šołtowka Ira Frackmannowa a prědkstojaŕ René Schneider pětk, 9. januara, na tradicionelnu woklapnicu w Smogorjowje. Wobydlarje su w bogatej licbje pśepšosenjeju slědowali, ga do zmakańskego centruma „Jung trifft Alt“. Gromaźe ze zastupnikami gmejny a wjele aktiwnymi smogorjojskimi towaristwami su se do togo dali, zachadne lěto „hoklapaś“, se pak teke informěrowaś wó planowanych lětosnych projektach we wjelikej licbje. Z cymž jo prědkstojaŕ René Schneider zachopił: Wón jo žycył wšym zgromaźonym pśedewšym jadno – měr we tom njeměrniwem casu.