Z Města a Janšojc/Cottbus und Jänschwalde. K oficielnemu zastajenju (Stilllegung) bloka A w milinaŕni Janšojce pokažo wobswětowa seś Zelena liga na to, až juž wót někotarych tyźenjow młoge łužyske wuglowe bloki milinaŕnjow njeźěłaju – dwa bloka a casy teke styri. Lěcrownož w decembrje 2025 by wuglowe milinaŕnje pópšawem dejali měś jadnu „głownu sezonu“.

„Realita jo, jězdny plan k wótstupjenju wót wudobywanja wugla dawno pśedogóniła: Za tym až stej byłej w janšojskej milinaŕni dwa bloka juž pśez cełe lěśe wušaltowanej, su samo w zymjem młoge wuglowe bloki LEAG wót tyźenjow ze źěłom wopśestali“, groni Renej Šejc (Schuster) wót Zeleneje ligi. „Śim absurdnjejše jo to, až pśecej hyšći grunty za wuglowe jamy se wuswóje a až LEAG jo ze źělnym pólom Miłoraz samo póžedanje na nowe wudobywanišćo (Abbaufeld) stajiła.“ Wuše zastojnstwowe sudnistwo Budyšyn (Oberverwaltungsgericht) jo ga w decembrje rozsuźiło, wobsejźarje góle pśi Rownem wuswójś, aby se ta płonina, kótaruž jo Zelena liga za kulturne zarědowanja wužywała, pśipadnuła Wochozańskej brunicowej jamje.