Z Města/Cottbus. Wjele, wjele lět dłujko stej sportowe zjadnośeństwo „Frisch auf“ Brjazyna/Briesen a sportowe zjadnośeństwo Gogolow/Groß Gaglow pśewjadłej swójski turněr w balokopanju, a to pśecej ned na zachopjeńku nowego lěta. Lětosny turněr slědnu sobotu we wjelikem sportowem centrumje „Lausitz-Arena“ w Chóśebuzu pak jo był kradu hynakšy a nowy. Wobej zjadnośeństwje ga běštej se dojadnałej, prědny raz wugótowaś zgromadny turněr a to ako „Cottbuser Hallenmasters“. Chóśebuski wušy šołta Tobias Schick a krajny raźc Sprjewja-Nysa Harald Altekrüger stej za to pśewzełej to „kmótšojstwo“.