14. stacija: Tšupc/Straupitz

Nježli z našeju Błośańskeju zeleznicu dalej jěźomy do Tšupca, comy hyšći ceło krotko wustaś pśi staciji „Seekurve“, wó kótarejž jo było slědny tyźeń to grono w Casniku. Smy pisali, až stej byłej něga raz w bliskosći dwa jazora – ga ten „Großer Dutzendsee“ a ten „Kleiner Dutzendsee“. K tomu jo se w „Lubinskem domowniskem kalendarju“ w lěśe 1930 wšake pisało. Nejpjerwjej to, až jo to było pózdźej jano jadno jazoro a tomu su gronili „Tšupcańske jazoro“, něźi dwa kilomejtarja zdalone wót Tšupca. Nastali běchu wón a teke dalšne bliske jazora w lodowem casu. Běłogórjańske a teke Bělinske jazoro stej wóstałej až do źinsajšnego, „Tšupcańske“ pak nic. Tam jo była wóda bejnje niska, a toś su se wšake rostliny bejnje rozšyrili, ta wóda jo se zgubiła a nastało jo bagno, a pózdźej pón źinsajšna krajina...