Z Města/Cottbus. Spěchowanjeju łužyskego muzikowego twóriśelstwa z twóŕbami nimskich kaž serbskich komponistow běchu sebje iniciatory Chóśebuskeje muzikoweje nazymy pśed 51 lětami kšuśe zapisali. Pśed dwěma tyźenjoma, ga 18. nowembra, jo se wótměł pód titelom „Muzika našogo casa“ skóńcny koncert lětosneje Chóśebuskeje muzikoweje nazymy w koncertowni campusa Bramborskeje techniskeje uniwersity Chóśebuz-Zły Komorow (BTU). We wjelgin derje połnjonem zalu su póbitowali docenty, absolwenty a studenty studijnego směra instrumentalneje a spiwneje pedagogiki zajmny repertoire nimskich komponistow kaž tež serbskeju komponistowu klasiskeje moderny. Mjazy woglědarjami su byli teke komponista Frank Petzold a Jan Cyž tak ako wudowa Detlefa Kobjele, Marija Kobjelowa. Wšych tśoch jo wjednik kuždolětnego koncertowego eventa a moderator wjacora, dr. Bernhard Reichenbach, wósebnje wuwitał.