Z Turnowa/Turnow. 17 młoźinskich kupkow – dogromady wušej 50 młodostnych – su se schadali zachadny pětk w gósćeńcu „Zum goldenen Krug“ w Turnowje. Jo to był slědny młoźinski aktiw Domowiny togo lěta. Dla togo, až dej byś wótzamknjenje lěta teke pśecej góźba za małe wuźěkowanje, su směli młoźinske šefy togo jadnogo abo drugego wósebnje angažěrowanego cłonka młoźiny sobu pśinjasć.

Na dnjownem pórěźe njejo tenraz wjele stojało. Młoźinski koordinator Tobias Unger jo tych młodostnych hyšći raz wjelgin wuchwalił. To jo wěste wupominanje, nałogi woplěwaś a te z nimi zwězane zarědowanja organizěrowaś a pśewjasć. „Lětosa njejo to za was pśecej lažko było, pśi spócetnych terminach wóstaś. To zwisujo cesto z pytanim za kapału“, jo Tobias Unger swójo rozměśe zwuraznił. Jo ga pśišło k wótchylenjam pśi znowskich zapustowych terminach. Někotare jsy su wót swójich zwuconych terminow wótbocyli.