Z Města/Cottbus. Wałtoru, 11. nowembra, na 50-tem dnju jeje zamrěśa jo było w Serbskem muzeju w Chóśebuzu kazane na serbske blido ku cesći Miny Witkojc. Na 30 wobźělnikow jo spomnjeło na wuznamnu „serbsku žeńsku ze jsy, ako jo nam zawóstajiła teliko literarnych a žurnalistiskich źěłow“. Tak jo kuratorka Serbskego muzeja a moderatorka wjacora, Christina Kliemowa, ju wopisała we swójom wuwitanju. Pśewóstajiła jo pón słowo nawjedujucej lektorce Ludowego nakładnistwa Domowina w Budyšynje, Janka Pěčkojc de Levano. Wóna jo prezentěrowała nowe kniglicki z rymowanym źiwadłowym graśim „Fryco a Majka. O manźelstwo, ty janźelstwo“ z pjera Miny Witkojc. Wujšło jo wóno do togo jano jaden raz w starych Pratyjach z 1930-tych lět. W nowem wjelgin rědnje a zajmnje wugótowanem wudaśu nadejźomy wěrne sceny z manźelstwa wó „škrjakotanju a wujadnanju“ w rědnej a jědernej dolnoserbšćinje, na luštny part napisane. Wurězki stej Diana Šejcowa a Gregor Kliem wót Serbskeje redakcije rbb wěrnosćiwje a rozwjaselecej pśedstajiłej.