Z Budyšyna/Bautzen. Wałtoru tyźeń jo se prezidium Domowiny w budyšyńskem Serbskem domje zmakał. Mjazy drugim su pśigótowali pśiduce pósejźenje Zwězkowego pśedsedaŕstwa Domowiny, ako buźo 5. decembra w Chóśebuzu. Na tom dnju buźo se wósebne pśipóznaśe młodeje ekscelence w dolnoserbšćinje pśepódaś. Tak se gódnośi wuspěšne nawuknjenje dolnoserbskeje rěcy na wusokem niwowje. Teke wó aktualnosćach imersiwnego kursa Zorja a wó wideowem projekśe za wjelerakosć w Dolnej Łužycy buźo to grono na tom posejźenju. Mimo togo se pśedstajijo aktualna ewaluacija rěcnych zamóžnosćow wuknikow. Dalej ma se na pósejźenju zwězkowego pśedsedaŕstwa wuběrk za pśigót Mjazynarodnego folklornego festiwala 2027 wutwóriś.

Dnja 26. nowembra se zmaka w Barlinju póraźujucy wuběrk za pšašanja serbskego luda. Wobźěliś budu se wót Domowiny pśedsedaŕ Dawid Statnik, zastupny pśedsedaŕ dr. Hartmut Leipner kaž tek głowna jadnaŕka Judit Šołćina a jadnaŕ Marcus Końcaŕ. Teke Załožba za serbski lud jo we wuběrku zastupjona.