Čorny Chołmc/Schwarzkollm. Jadnaŕ carnochołmcańskego Krabatowego młyna Anton Fuchs jo pónjeźele, 10. nowembra, něźi 65 luźi na mjaztym tśeśi Serbski góspodaŕski forum witał. Pśedewšym jo šło tenraz wó góspodaŕski wobłuk turizma. Zarědowanje jo rownocasnje móžnosći pokazało, kak góźi se serbska rěc w pśedewześach (Unternehmen) zapśimjeś. „Gódnotu dwójorěcnosći měli se teke w góspodaŕstwje wuwědobniś a zachowaś“, jo pśedsedaŕ Domowiny Dawid Statnik wuzwignuł.