Ze Smochćic/Schmochtitz. Na konferencu pód motom „Domoj do pśichoda – wěcejrěcna Łužyca 2100: wizija. zagronitosć. zgromadna seś“ jo seś za serbsku rěc a regionalnu identitu ZARI zajźony stwórtk pśepšosyła. Něźi 110 wobźělnikow z wšakich regionow Łužyce jo do Smochčanskeho kubłanišća swětego Bena pśichwatało. Pśi tom su se zaběrali zastupniki towaristwow, kubłanišćow, politiki a pśedewześow z tym, kak ma se serbska rěc zgromadnje zmócniś a skšuśiś.

Wótwóriła jo konferenca prof. dr. Nicole Dołowy-Rubińska z wědomnostnym pśednoskom „Wót wizije k akciji: kak rěcnu rewitalizaciju planujomy“ a dr. Jörg Heidig jo wuslědki Łužyskego monitoringa pśedstajił.

Na konferency su se wobźělniki w pěś workshopach zaběrali z wšakimi aspektami, kótarež su pśiwzete do akciskego plana za górnoserbšćinu. Śěžyšća su byli dwójorěcnosć we wšednem dnju, widobnosć serbšćiny a nowe póbitowanja za wuknjenje rěcy. Mimo fachowych impulsow a wjele praktiskich pśikładow jo póbitowała konferenca móžnosći se rozgranjaś, diskutěrowaś a nowe kontakty plasć.