9. stacija: Smogorjow/Schmogrow

Chtož ma spěšne a strowe nogi, ten dojśpijo pó staciji „Bórkowy Bismarkowy torm“ pó poł góźinje pśiduce něgajšne dwórnišćo „Błośańskeje zeleznice“, ga to we Smogorjowje. Tam, źož su lažali te kóleje, jo něnto wjelgin rědna sćažka za drogowanje a kólasowanje. Jo to rowna smuga, hejnak z linealom śěgnjona, nalěwo a napšawo ze staršymi wjelikimi bomami z casa „Gusty“ a tek z młodšymi. Na wobyma bokoma su za wětšy źěl błośańske łuki a how a tam su wiźeś burske žywnosći ze staršymi a teke nowymi twarjenjami. Ku kuždej wjeźo teke někaka droga. Tak pšawje njewěš, lěc wóni słušaju k Bórkowam abo lěc su južo smogorjojske.

Sćažka z mjenim „Am Bahndamm/Zelezniski nasyp“ wjeźo pśez wšake mósty. Tej nejwětšej stej krotko pśed smogorjojskim dwórnišćom – ga ta pśez Blušnicu (Großes Fließ) a ta pśez Žrěbjeńcu (Kleines Fließ). Rowno tak wjeźo jaden móst pśez tšugu „Schlossbergfließ“ a dalšne pśez južo suche groble a pśez take, ako deje šćitaś pśed wusokeju wódu.