Filmowy festiwal Chóśebuz jo se skóńcył njeźelu ze slědnymi filmami, mjazy nimi teke styri wót serbskego filmarja Romana Pernaka, kótaryž jo se pócesćił z spěchowańskim mytom Załožby za serbski film. Co jo hyšći wiźeś było, wósebnje w sekciji Heimat/Domownja/Domizna, a co jo se stało kołowokoło festiwala w měsće, to zgónijośo how a pśiducy tyźeń w Nowem Casniku.

Wótwóriła jo se sekcija Heimat/Domownja/Domizna za serbske, łužyske a mjeńšynowe filmy ned na prědnem dnju festiwala, ga wałtoru, 4. nowembra, wjacor w Gladhouse. Kurator sekcije Daniel Kubik jo dwójorěcnje wuwitał – bóžko mało publikuma – ze słowami „Žycym Wam dobru projekciju!“.