Z Prožyma/Proschim. Kak mógu se serbska rěc, serbska tradicija a kultura mócnjej do turistiskich póbitowanjow we Łužycy zapśimjeś? Toś tomu pšašanjeju jo se pśiwobrośił workshop „Sorbisch erleben – Impulse für Tourismus und Gastgewerbe“, ku kótaremuž jo Serbski kulturny turizm z.t. pětk, 7. nowembra, do kulturnego doma w Prožymje pśepšosył.

Mjazy wobźělujucymi, źělnje z gósćinaŕskego źěłaŕstwa a z turizma, su nastali napněte diskusije a praksy bliske ideje wó tom, kak móžo serbska kultura w zawoźe widobna a dožywjujuca wordowaś.

Sobuźěłaśeŕ Serbskego instituta Měto Nowak jo w impulsowem pśednosku pśikłady z drugich mjeńšynowych regionow w Europje pśedstajił, tak z Isle of Man abo z Pódpołdnjoweje Tirolskeje.

W pśizamkujucych workshopach su wobźělujuce źěłali na wšakich temach, kaž „serbska rěc w zawoźe“, „kulturelne póbitowanja“ a „awtentiske dožywjenja za gósći“.