Böhlen/Großdeuben. We měsće Böhlen, wesrjejź něgajšnych brunicowych jamow na pódpołdnjo Lipska, pśigótuju pupkowe graśe w nimskej, górno- a dolnoserbskej rěcy. „Krabat wumrějo“ abo „Krabat stirbt – Ein Zauberstück für Stabpuppen und Drehleier“ jo skerjej licha interpretacija maśizny wokoło powěsći togo dobrego serbskego guslowarja, kótaruž jo naźěłało wuměłstwowe duo schoenbrodtkuerschner GbR.

Pupkowe grajaŕ Moritz Schönbrodt jo awtor kusa, kenž wón gromaźe z muzikarjom Johannes Kürschner insceněrujo. Pupkowa grajaŕka Linda Fülle wudopołnijo ten team, kótaryž se pó eksperimentalnej wašni z Krabatoweju powěsću zaběra. W starej blidaŕni w měsćańskem źělu Großdeuben su swójsku źěłaŕnicku wugótowali a tam kulisu, figury a rekwizity baslili.

W teamje nichten z Łužyce njepóchada, weto su měli južo młogi kontakt ze Serbami. Wšykne pak znaju Krabata Otfrieda Preußlera hyšći ze šulskego casa, lěcrownož se jim pśeźěłanje w twóŕbje Jurija Brězana wó wjele lěpjej zda.