Z Bozena/Bolzano/Bulsan. Na kongresu narodnych mjeńšynow w Pódpołdnjowej Tirolskej w Italskej su sobotu, 25. oktobra, nowego prezidenta wuzwólili. Loránt Vincze njejo mógł wěcej na wólbach nastupiś, dokulaž jo toś ten amt južo wob tśi legislaturne periody wugbał. Mjazy tśimi kandidatami su dejali se delegaty rozsuźiś. Z jasneju wětšynu wót 180 głosow jo Olivia Schubert wuzwólowanje dobyła.

Nowa FUEN-prezidentka póchada z nimskeje familije w regionje Hungorskeje, źož su wótere mjeńšyny žywe. Wóna jo w měsće Köln studěrowała a ma wobšyrne nazgónjenja ze źěłom z mjeńšynami w Nimskej a pódzajtšnej Belgiskej. Mjaztym statkujo Olivia Schubert južo 25 lět za zjadnośeństwo hungorskich Nimcow we wšakich wjeźecych pozicijach a załožbach. Pśi tom źěła gromaźe z narodnymi kaž teke z mjazynarodnymi statnymi a ciwilnymi organizacijami. Wót lěta 2022 jo južo amt wicepśedsedaŕki FUEN wugbała a jo wobšyrny póglěd do nadawkow prezidiuma dostała.