Z Města/Chóśebuz. W lěśe 1989 jo serbski režiser a awtor Jan Hempel nawjerśeł w kooperaciji z DEFA-studijom trikowy film z pupkami z titlom „Als es noch Wassermänner gab“ na zakłaźe swójich źiśecych knigłow „Wie der Wassermann zum Braschka wurde“ (1974). Akle wušej 30 lět pó wózjawjenju nimskorěcnego filma 1991 – ga slědnu njeźelu wótpołdnja – jo wón pód titlom „Ako su hyšći žywe byli wódne muže“ swěśił swóju dolnoserbsku premjeru. Ju jo dožywiło jadnab 30 drosćonych a 10 źiśi w chóśebuskem Obenkinje a premjera jo słušała k ramikowemu programoju Filmowego festiwala Chóśebuz. Tak jo gósći pó zawjedujucych słowach kinoweje wjednice Juliane Gründel teke kurator za sekciju „Heimat/Domownja/Domizna“ Daniel Kubik wuwitał. Wósebnje źiśi jo wón pó pśedstajenju filma pśepšosył na głažk nykusoweje limonady a chłošćonki kaž teke na baslenje.