Strjažow/Striesow ma z lěta 2016 swójsku wejsnu chroniku. We njej zgónijo cytaŕ južo wjele, wjele interesantnego z wušej 550 lět dłujkeje historije jsy. Něnto pak mamy na bliźe dalšne knigły, w kótarychž namakajomy hyšći dalšne, za wětšy źěl teke nowe informacije z teje serbskeje jsy, ako twóri z Dešnom zgromadnu gmejnu.

Te nowe knigły abo kniglicki – to jo ta Serbska Pratyja za lěto 2026. Redakcija ga běšo se wupytała ako titelnu wjas za toś to wudaśe tenraz Strjažow. A to jo se napšawdu wupłaśiło! Redaktorki a awtory su we tej jsy wjele wuslěźili, což jo se tam w slědnyma dwěma stolěśoma wšykno stało, se tšojło, a kótare wobydlaŕki a wobydlarje běchu něco wažnego a gódnego na wšaki part naźěłali.