Z Města/Cottbus. „Mina Witkojc a jeje pśiswójźbne“ – k toś tej temje jo se zmakało wałtoru, 7. oktobra, 15 luźi – mjazy nimi pěś z Bórkow póchadajucych a jadna pśiswójźbna – w kjarcmje „Zur Friedensburg“ na Karlowej droze 68 w Měsće, aby se wuměniło wó familiji Miny Witkojc. Gósćowaŕka a moderatorka Stefanie Krawcojc jo wšyknych wuwitała a jo pokazała na to, až jo Mina wěsty cas ned wokoło roga bydliła, na Beuchowej, źož jo bydlił jeje šwogor, konditaŕski mejstaŕ, Karol Teplý ze swójeju žeńskeju , młodšeju sotšu Miny. Lěcrownož jo w pśepšosenju stojało, až njedej byś zarědowanje zmakanje ekspert(k)ow, ga jo pśisamem kuždy a kužda swóje ceło wósobinske spomnjeńki na basnikaŕku a jeje bórkojsku wokolinu dał/a k wěsći. Pśedstajił jo se aktualny staw rešeršow k Witcyc a Poleńcojc rodopisoma (Stammbaum). Jo se powědało wó njemanźelskich źiśach a wó Poleńcojc patchwork familiji. Identificěrowało jo se Minine slědne pśebywanišćo w Bórkowach. Smy słuchali na dopomnjeńki tegdy něźi 12-lětnego źowća z bliskego susedstwa, kenž jo z Minu rože sajźiło a kótaremuž jo kśěła Mina muzicěrowanje zbližyś.