Z Města/Cottbus. Kšac pó kšacu wózjawiju se online informacije a nowosći k mjaztym južo 35. Filmowmu festiwaloju Chóśebuz (FFC), kenž se wótmějo wót 4. do 9. nowembra. Pśewjele wó programje, kenž se wózjawijo akle 14. oktobra, pak njejsu pśeraźili. Dla togo smy se wobrośili na kuratora sekcije Heimat/Domownja/Domizna, na Daniela Kubika.

Škóda jo, až naslědnik Łužyskeje filmoweje pśeglědki z titlom „Kaleidoskop“, kótaryž jo wósebnje łužyskim abo serbskim filmowym amateram šansu dał, se ze swójimi twóŕbami prezentěrowaś, njebuźo. Město togo stara se Serbski ludowy ansambel za serbskorěcny zachopk festiwala: Njeźelu, 2. nowembra, pśepšosyjo SLA na dolnoserbsku premjeru filma „Ako su hyšći žywe byli wódne muže“ do Obenkina.

Mała twóŕbowa pśeglědka (Werkschau) pśiwobrośijo se filmarjeju ze serbskimi kórjenjami, ga Romanoju Pernakoju, z krotkofilmami z Barlinja a Egyptojskeje a z portrejom komponista Jura Mětška z titlom „Jadna gesta, jaden dych, jaden kosmos“.