Z Města/Cottbus. Wót 29. septembra do 2. oktobra jo sociolinguistika dr. Ruth Kircher z Flensburga wóglědała do Dolneje Łužyce. Pśi tom jo wopóznała źěło Serbskego instituta, jo rozpšawiła wó swójej ekspertize wót slěźenja z nowymi powědarjami a jo hospitěrowała pśi serbskej imersiji.

Ako sociolinguistka ze specializaciju na wěcejrěcnosć a mjeńšynowe rěcy jo dolnoserbski kontekst za dr. Kircher tak zajmny, dokulaž dalejdawanje rěcy stawa se něnto pśewažnje pśez nowe powědaŕki a nowych powědarjow (newspeakery). Newspeakery su wósoby, kenž sebje mjeńšynowu rěc w familijowem wobswěśe abo w zgromadnosći njepśiswójuju, ale pśez kubłanje abo wósobinsku motiwaciju nowo nawuknu. Na zakłaźe swójogo dłujkolětnego slěźenja z toś teju powědaŕskeju kupku, jo ju pśepšosyło wótźělenje za regionalne wuwiśe a mjeńšynowy šćit Serbskego instituta.