Ze Slěpego/Schleife. Serbski kulturny centrum (SKC) Slěpe jo zachadnu njeźelu na nazymski mark pšosył. Pyšne ako nazyma su byli teke te póbitowanja we wjelikej licbje. Wušej 25 wikowarjow, rucnikarjow a źěłaŕstwo wugbajucych jo se ze swójimi póbitowanjami prezentěrowało. Z dujaŕskeju muziku su rozwjaselili „Oberlausitzer Blasmusikanten“, pótom „Cottbuser Musikspatzen e.V.“. Za dalšny program su se starali cheerleadery wót lodnego sporta Běła Wóda, Katja Fietz z módrośišćom a slěpjańske dujarje na góńtwaŕskem rogu „Hubertuseck“. K wjeraškam swěźenja su słušali w zalu pśeglědka jabłukow, wobogaśona wót ekspertize pomologa Klaus Schwartz z Lubija (Löbau), pśeglědka tomatow ze zagrodoweju fachoweju póroźaŕku Birgit Kempe z Drježdźan a gribowe póraźowanje z geoparkowym wjednikom Uwe Bartholomäus. Sadowy ekspert Klaus Schwartz jo powědał wó super jabłukowych žnjach. Na swójej plantažy w Lubiju ma wušej 700 jabłukowych sortow, wušej 300 jo sobu pśinjasł do Slěpego. Wjele woglědarjow jo wužywało móžnosć, wěstosć wó sorśe swójich jabłukow dostaś.