Z Janšojc/Jänschwalde. Sobotu, 20. septembera, jo był wjeliki ruš w Domowniskem muzeju w Janšojcach. Tam ga jo była muzejowa noc. Lětosny program jo był kradu wótměnjaty. Zachopili su ako pśecej zeger šesćich, gaž słyńco pómałem zajźo a pšawa noc se zachopijo – pšawa muzejowa noc. W toś tom lěśe su samo z Chóśebuza zajmne gósći pśijěli: wuměłska rejtowańska kupka Ompah. Wóni su w zapśimujucych scenach pokazali tšojenje wót nocnego jagarja. Ale aktery su teke druge powěsćowe figury ako te małe lutki do žywjenja brali a su z tym wšyknych zajmcow wobguslowali. Źiśi a teke starše gósći su kradu spokojom byli, a to z wjelikim aplawsom pokazali. Pótom jo wustupił žeńskecy a muskecy chor „Frohsinn“ a jo na wjelikem dwórje pśi muzejowej brožni stare serbske spiwy prezentěrował. Tśi góźiny dłujki program jo skóńcył z janšojskimi dujaŕskimi gercami. Wejsanaŕki a wejsanarje su se wšykne tomu wjaselili a na městnach sobu rejowali a hympali. Ta rědna muzika jo na toś tom śichem wjacoru samo słyšaś była w Drjejcach.