Z Pódstupima/Potsdam. Sobotu, 27. septembra, jo Bramborski krajny sejm swěśił jubileum 35-lětnego wobstaśa. Prezentěrowali su programy wósebnje młoźinskich projektow ze źiwadłom, filmami a z muziku. Pśed plenarneju žurlu su krajne młoźinske koło a Serby se prezentěrowali. Ze serbskego boka stej se wobźěliłej Kathrin Šwjelina, wjednica domowniskego muzeuma w Dešnje a něgajšna pśedsedaŕka Serbskeje rady, a Měto Nowak, cłonk aktualneje Serbskeje rady. W rozgronach z 50-60 luźimi stej informěrowałej wó Serbach. Někak połojca rozgranjańskich partnarjow a partnaŕkow jo južo znała Serbow, pak ze šulskego casa, pak dokulaž su južo byli we Błotach. Cesto su se pšašali, lěc jo móžno serbšćinu w šulach wuknuś. Teke dwójorěcne wutoflowanje a politiske źěło stej tema byłej. Praktiske temy kultury ako nałogi, drastwy a wósebnje módrośišć su teke wjelgin zajmne byli. Pla wšakich jo se plan zmócnił, pśichodnje do Łužyce woglědowaś. Cesto su teke gronili, aby se wjaselili, kak žywa serbska kultura źinsa jo, a su žycyli Serbam wjele wuspěcha a wjele mócow, to dalej wutwariś.