Z Města/Cottbus. „To jo zapśimujuce, až swět jo pśez symbole zwězany.“ To jo było jadno tych zakładnych zwěsćenjow pśi podiumowem rozgronje, ku kótaremuž jo Serbski muzej pětk, 12. sepembra, w ramiku wósebneje wustajeńce „Christina Grecojc. Poezija pśirody“ pśepšosył. Južo ta wustajeńca ako taka to wugrono pódšmarnjo – jo ga wuměłski a kulturelny dialog mjazy tradicionelnymi mustrami serbskich jatšownych jajow, kótarež jo Christina Grecojc w swójej nowej wuměłstwowej formje nowo interpretěrowała, a mjazy awstralskimi dot-paintingami. How ako tam powěda wósebna rěc symbolow z twóŕbow.