Z Města/Cottbus. „My smy te luštne luźe z Łužyce. A wótkul pśiźomy? Ze Złego Komorowa. Tam se hyšći serbski powěda.“ Tak jo Ginter Pawliš gósćam wósebneje tejoweje pśestawki w Uty a Hagena Stoleccyc tejowej lodce Oblomow pśi wuwitanju rozkładł. Wón jo se 28. awgusta z tśimi dalšnymi cłonkami kupki „Pśěza“ ze Złego Komorowa do Chóśebuza wudał, aby w Oblomowje wugótowali wótpołdnjo z dolnoserbskimi spiwami. Mjazy něźi 15 woglědarjami su byli pódla serbskorěcnych luźi teke zachopjeńkarje. Jadna wobźělnica kompaktnego kursa rěcneje šule jo na pśikład sobu pśinjasła pśijaśelki, kótarež „serbsku rěc raźi słyše“.