Ze Žylowa/Sielow. Prědny kšamaŕski mark na dwórach w měsćańskem źělu Žylow jo był połny wuspěch. Wušej styrźasća dwórow jo sobotu gótowało sobu. K tomu su hyšći pśišli pomocniki ze susedstwa póbitowarjow. Wjele zajmowanych kupcow jo pśišło, jo se wjaseliło tomu abo drugemu dobremu kusoju. „Som ga w Žylowje južo dwójcy organizěrowała adwentske pśechójźowanje a pśez to mam dobru seś. Ideja kšamaŕskego marka na dwórach jo se južo dłujko w našych głowach wjerśeła a tak smy zachopili, za se góźecym terminom pytaś“, wulicujo iniciatorka Claudia Nowakojc (Noack). „Za tym, až ten jo był namakany, smy startowali napominanje (Aufruf). W běgu jano poł góźiny jo dało južo 16 pśizjawjenjow“, se wóna z radosću dopomnjejo. Młoda žeńska jo wuwiła zgromaźe ze pśijaśelku Jenny Pätzoweju teke tu ideju, ze wšyknymi wobźělnikami něco za swěźeń wót 19. do 21. septembra k 725-lětnemu wobstaśu Žylowa cyniś. Tak dajo kuždy žywnosćaŕ późěl swójich nabrankow do jubilejneje kase, mimo togo su se pla marka teke pjenjeze w pósćiwańskich tejzkach zběrali.