Z Města/Cottbus. Pó konstituěrowanju 2. Serbskego sejma 12. apryla we Łazu, su se wótpósłańce we tej nowej konstelaciji prědny raz slědnu sobotu w chóśebuskem Měsćańskem domje na pósejźenje zmakali. Ako wjednik pósejźenja jo Tomaš Wornar wšyknych pśibytnych póstrowił, a wósebne wuwitanje jo měrił na zagronitu za nastupnosći Serbow Chóśebuza Annu Kosacojc-Kozelowu, kótaraž jo how teke zastupiła wušego šołtu Chóśebuza Tobiasa Schicka. Za góspodliwosć jo se wugronił wjeliki źěk wušemu šołśe ako měsćańskemu zastojnstwoju. Tobias Schick jo gósćinaŕ togo pósejźenja, bóžko njejo se wobźěliś mógał, ale jo sejmikarjam list pósłał, kenž jo se teke na zachopjeńku pśedcytał. Tam dajo wobwěsćenje, až Chóśebuz ako nejwětša komuna w serbskem sedleńskem rumje w Bramborskej jo a buźo nadalej spušćobna partnaŕka Serbskego sejma, co jen pódpěrowaś. To jo teke Anna Kosacojc-Kozelowa w swójich póstrowjeńskich słowach pódšmarnuła a na to pokazała, až wušy šołta jo ako za wólby Serbskeje rady tak teke za wólby 2. Serbskego sejma wabił.