Źož jo pśedsłowo w dolnoserbskej rěcy, ma se to, se wě, ako prědne naspomnjeś. W junijowem wudaśu Rozhlada jo nam pisał Daniel Häfner, jadnaŕ Plon GmbH, kak se twóri pśi subkulturnych serbskich festiwalach kaž SubSorb abo Witaj-Festiwal wósebna zgromadnosć z pozitiwneju dynamiku, źož to serbske se namakajo w zmakanju mjazy luźimi – a se docynijo motoju „Gromaźe njejsy sam“.

Pód nadpismom „Za samopóstajowanje a rownopšawne wobźělenje“ cytamy we tom Rozhlaźe teke dwójorěcnu (pótakem zdźěla tek dolnoserbsku) lawdaciju, kótaruž jo dr. Christiana Piniekowa źaržała ku góźbje swětosnego konstituěrowanja 2. Serbskego sejma, 12. apryla we Łazu. Wóna glěda pśi tom tek do stawiznow, pokažo na rozpšawu źěłoweje kupki pśi Zwězkowem ministaŕstwje, ako jo pó analyzy 2011 zwěsćiła, až zastupnistwo zajmow serbskego luda pśez wobstojecy institucionelny model dosegajuce njejo.