Kórty znajomy wšykne. W šulach smy wuknuli z geografiskimi atlantami źěłaś. We wšednem dnju wužywamy źinsa digitalne kórty w interneśe abo w nawigaciskich systemach. A w casnikach a knigłach cesto wiźimy kórty ako ilustracije. Ale kak su se pópšawem kórty wuwijali, na kótarychž jo serbska Łužyca wiźeś abo kak jo to z dwójorěcnymi mjenjami na kórtach? Wědomnostne discipliny ako geografija, kartografija abo sorabistika njejsu se z tym dotychměst zaběrali, lěcrownož se wužywa teke w serbskich tekstach cesto stare a nowe kórty.