Z Lubina/Lübben. Dnja 6. maja, pśi góźbje 80. wrośenice kóńca Drugeje swětoweje wójny, jo se wótměł w Lubinje workshop ze 60 seniorami a seniorkami z wokrejsa Dubja-Błota kaž teke z Kargowa w Pólskej. Pód titelom „Migracija, mjeńšyny, wójna a wujadnanje“ jo se pśiwobrośiło zarědowanje nimsko-pólskim stawiznam. Na pśikłaźe migraciskich stawiznow Serbow su se wobźělniki temje bližyli. Zmakanišćo ze Serbskeju kulturneju soninu jo było na serbskem burskem dwórje pla błośańskeje Christloweje w Kamjennej. Sabrina Kušyna, zagronita za nastupnosći Serbow wokrejsa Dubja-Błota, a šołta ze Schulzendorfa, Markus Mücke, stej witałej gósći z małymi serbskimi darami a muzikaliskim zachopkom. Pó nagronje su wšykne k wustawadłoju šli a jězba z cołnom pó Błotach jo se chopiła. Z dwěma cołnoma su wšykne byli ducy do směra grodoweje kupy Lubin. Jězbu jo sonina garněrowała z muzikaliskimi pśinoskami z łužyskimi dudami, harfu, koncertinu a gitaru. Pśi tom su serbske spiwy zgłosyli ako „Ty sy taka wijkotata“, źož su mógali wšykne sobu spiwaś.