Z Helgolanda/deät Lun. Wót 23. do 25. maja su se zmakali na kupje Helgoland wótere hunderty Frize z Nimskeje a z Nižozemskeje. Toś to zmakanje jo było to kužde tśeśe lěto se wótměwajuce zmakanje Frizow, kenž jo młogemu snaź hyšći znate pód starym mjenim „Sternfahrt der Friesen“.

We fokusu su stojali, se wě, te friziske rěcy a teke dolnonimšćina. Shanty-chory, zacuśow połna muzika w helgolandskej frizišćinje wót „Noctiluca“, pódwjacornofriziske balady wót Wiebe Kaspers a wšake spiwy, kótarež su friziske woglědarje spontanje zgłosyli, su pokazali wjeliku wjelerakosć friziskeje muzikoweje kultury. Njeźelu zajtša jo se wótměła namša, pśi kótarejž jo se powědało a spiwało we styri friziskich rěcach (te tśi głowne su pódwjacorna frizišćina, saterfrizišćina a pódpołnocna frizišćina – a na Helgolanźe jo tek tamny dialekt zazněł), ale teke w dolnonimskej a nimskej rěcy.