Z Města/Cottbus. Něźi jo to dotychměst pśecej klěcało, gaž jo se wopytało, proces za wuwijanje dolnoserbskeje rěcneje strategije pśistarcyś. Ambicioněrowany wopyt jo był projekt „jo!zatebje“, kenž jo Měto Nowak – tencas ako „Rěcny centrum WITAJ Dolna Łužyca“ – iniciěrował, koordiněrował a gótował. „Smy w lěśe 2013 zachopili to pśigótowaś a 2014 jo było prědne zjawne zarědowanje, wózjawjenje internetowego boka a informaciskeje brošurki“, wón rozkłaźo. Bóžko jo se ten projekt w běgu casa mjazy nosarjami zgubił. Śěžkosći su změstymi z tym zwisowali, až jo Měto Nowak wót Rěcnego centruma do Ministaŕstwa za wědomnosć, slěźenje a kulturu (MWFK) změnił. „Ako MWFK som mógał to jano wobgranicowane dalej gótowaś. Som to pśez serbsku akcisku seś cynił“, wón wulicujo.

Motiwacija, zgromaźe něco k rewitalizaciji dolnoserbskeje rěcy pógibowaś, ga njedej se zgubiś. Wót łońskego jo Měto Nowak sobuźěłaśeŕ Serbskego instituta – a Serbski institut jo pśewzeł koordinaciju projekta za cas wót 2024 do 2027. Tak źo to něnto z tym, což jo se zachopiło ako „jo!zatebje“, z nowymi energijami dalej – ga pód labelom SROKA.