Z Janšojc/Jänschwalde. Wuglowy a energijowy koncern LEAG co na tych płoninach brunicoweje jamy Janšojce, ako su se kóńc 2023 zastajili (stilllegen), pśichodnje na wjeleraki part energiju producěrowaś, pśetwóriś a wobchowaś (speichern). Napšawy su źěl cełkownego projekta „GigawattFactory“. To jo Dominique Guillou, jadnaŕ wobłuka za energije, kenž se wobnowiś daju, dnja 21. maja na pósejźenju pśi jamje rozkładł. „W něgajšnej jamje Janšojce wiźimy potencial za dwa gigawatt miliny. To wótpowědujo produkciji energije dweju atomoweju milinaŕnjowu“, jo gronił. Śěžyšća su wětšowy park Baršć-Rjasnik/Forst-Briesnig II, fotowoltaik-załožk Popjelnišćo Janšojce/Asche-Deponie Jänschwalde I njedaloko Klinkowego jazora (Klinger See) a pśichodnje teke fotowoltaik-park Bórow/Bohrau, wobchowańska fabrika (Speicher-Fabrik) Big Battery Móst/Heinersbrück a tśi pśepinaŕnje (Umspannwerke) k pśetwórjenju miliny. Zrownju nastanu płoniny za rolnikaŕstwo a za gólnistwo. Tejerownosći nastanu Mósćański jazor, Janšojski jazor a Dubojski jazor (Taubendorfer See) ako wódy pógórnistwoweje krajiny.