Z Drjowka/Drebkau. Na gluku jo njeźelu wót handyjowego appa pśipowěźone njewjedro městaško Drjowk šonowało. Howac njeby móžno było nowu wobźěłowanu stawnu wustajeńcu pód motom „Serbske žywjenje w Drjowku“ tudskego muzeja „Serbska tkajaŕska śpa“ na jogo lubosnje wugótowanem dwórje swětosnje wótwóriś. Wušej 40 luźi jo pśedsedaŕka Spěchowańskego towaristwa muzeja Margit Neugebauerowa pó muzikaliskem zachopku kapały Drjewjanki wuwitała – a to teke pó źělach serbski. Wšak štycy za wobźěłanim stawneje wustajeńce ideja, ju ze pśedstajenim serbskego žywjenja w měsće wudopołniś. Za pśedsedaŕku towaristwa, za wjednicu muzeja Doreen Hajašowu, kaž teke za cłonkow spěchowańskego towaristwa ma to groni, „našym serbskim prědownikam respekt wopokazaś a naše serbske kórjenje luźam wuwědobniś“.