Z Janšojc/Jänschwalde. To jo był šok za źiśi, źiśownice a starjejše w Janšojcach, ako su wogano musali zwěsćiś, až jich janšojska źiśownja „Lutki“ jo była wopor wandalizma. Wjacor 20. maja su młodostne škódy napórali na tamnem grajkanišću a wokoło. Pótrjefjone su wenkowne projekty źiśownje, kótarež su se z wjele lubosću a kreatiwitu wugótowali, pśedewšym grědy, źož su zeleninu, zela a sad kubłali. Teke móžnosći k sejźenju źiśi, słyńcna płachta a wódna cera pśi pěskowem kašćiku su něnto znicone a knicomne, a to wšykno wósebnje te źiśi wjelgickan tužy. Wóni njamógu rozměś, cogodla něchten take něco z wótglědom cyni.

Zawěsćaŕnja (Versicherung) bóžko jano zarownajo škódy w nutśikownem wobłuku, nic wence. Togodla kśě angažěrowane starjejše pomagaś, wenkowny wobłuk zasej wobnowiś. Ale kosty za to su wusoke, pśedewšym dla togo, až za źiśownju směju se jano wobstaraś wěste, certificěrowane materialije a grajne rědy.