Z Města/Cottbus. Lětosa jo Rěcny centrum WITAJ (RCW) Chóśebuz zasej pytał młodostnych z Dolneje Łužyce, kótarež se wjelgin pilnuju na pólu dolnoserbskeje rěcy. Styri naraźenja jo RCW dostał a jo toś tych młodych luźi dnja 14. maja 2025 pśepšosył do klubownje Dolnoserbskego internata Chóśebuz na mały pśikusk.

Naraźone su byli tśi młode žeńske z Gołbina, kótarež su wjelgin aktiwne: Alina Bzdakojc, Leni Šymjeńcojc a Jenny Steinlandojc. Alina jo serbsku rěc nawuknuła na někotarych kursach, Leni jo wuknuła a Jenny hyšći wuknjo na Dolnoserbskem gymnaziumje w Chóśebuzu. Wšykne tśi su wjelgin wažne wósoby, gaž źo wó to, serbske tradicijowe swěźenje w Gołbinje kaž teke w susednych jsach planowaś a organizěrowaś. Na swěźenjach ako camprowanje, zapust, kjarmuša, ale teke na namšach wóni raźi serbski spiwaju a su teke jatšowne spiwaŕki w Gołbinje. Na namšach a swěźenjach cytaju nagrona w serbskej rěcy a motiwěruju drugich młodostnych, serbski powědaś a, se wě, serbski spiwaś.