Z Drježdźan/Dresden. Na prědne zjawne pósejźenje Sakskeje serbskeje rady w nowej wólbnej perioźe jo witała raźcowka Diana Šołćina slědny tyźeń wałtoru cłonkow rady, wótpósłańcow frakcijow a zastupnikow ministaŕstwow do rumow Sakskego krajnego sejma. W mjenju rady jo se wuźěkowała něgajšnemu pśedsedarjeju rady Markoju Suchemu za jogo statkowanje. W srjejźišću pósejźenja jo stojała mimo pśedłogi za góspodaŕski plan Sakskeje wósebnje sakska kubłańska politika nastupajucy Serbow, zasej na pśikłaźe serbskeje zakładneje šule w Radworju (Radibor). Kubłańska referentka Domowiny Katrin Suchec-Dźisławkowa jo pśedstajiła situaciju na šuli, źož planujo kultusowe ministaŕstwo wótpóranje koncepta 2plus a z tym reducěrowanje góźinow w serbskej rěcy za jadnu rědownju, dla pśichodnego 1. lětnika z wjelikeju licbu šulskich nowackow bźez pśed-znaśow serbskeje rěcy. Do rozsuda njejsu šulsku konferencu a serbskich zastupnikow – ako pomina kazń – zapśěgnuli.