Wědomnostniki Serbskego instituta w Lipsku su dnja 6. měrca pśez telewiziju rbb wózjawili, až pó jich wuslěźenjach jano někak 50 do 100 luźi dolnoserbski tak „pšawje“ wumějo, ako Europski ramikowy plan za cuze rěcy to za trjebne ma. To groni, luźe muse w cilowej rěcy wšykno rozměś, cytaś a pisaś móc a se liche rozgranjaś móc. Pótom maju niwow C 1. Ako fakt za dalšne źěło na serbskorěcnem pólu, jo to wažne wěźeś, ale termin za znatecynjenje njejo wjelgin wužytny był. Góspodaŕski plan Nimskeje (etat) za 2025 hyšći njejo wěsty. To groni, teke pjenjeze za spěchowanje serbskeje rěcy hyšći njejsu wěste. Něnto wě kuždy rozsuźecy politikaŕ, až njejo se wupłaśiło, až Nimska w zachadnych 35 lětach jo tak wjele pjenjez za dolnoserbske knigły wudał. Tu sumu by mógali lěpjej za digitalizaciju w nimskich góletkownjach wudaś. K tomu se góźi pódlańska sada redaktora togo wusćełanja, Phillippa Manskego, až by była serbšćina w DDR lěbda spěchowana. Njewěm, wót kótarego antisocialista wón tu informaciju ma.