Z Łaza/Lohsa. To w měrcu 2025 wuzwólone ludowe zastupnistwo Serbski sejm startujo do swójeje drugeje legislaturneje periody. Dwanasćo wótpósłańcow z Górneje a dwanasćo z Dolneje Łužyce we parlamenśe 2. Serbskego sejma sobu statkujo. Slědnu sobotu wótpołdnja su se zmakali cłonki a sympatizanty Serbskego sejma ku konstituěrujucemu pósejźenju we łazojskej radnicy. Jadnogłosnje su tam wobzamknuli jadnański pórěd (Geschäftsordnung) kaž teke manifest ako zakład za dalšne źěło. Mimo togo su se zaběrali z pśedłogu pśirucki (Handbuch), w kótaremž wšykne dotychměst wuźěłane zakłady Serbskego sejma deje se zapśimjeś.