Z Města/Cottbus. Blidowe balokopanje jo wjelgin woblubowane graśe w kjarcmach a młoźinskich klubach. Sćo pak južo słyšali wót blidowego lodohokeja (krotko: „blidohokej“)? Na Bramborskej techniskej uniwersiśe (BTU) w Chóśebuzu jo se łoni załožyła kupka, kótaraž póbitujo sportowy kurs za toś to graśe.

Dwa grajarja wopytajotej jaden puk do wrotow pśeśiwnika stśěliś. Za to wjerśitej a śěgnjotej žerdki, ako su mechaniski zwězane z grajnymi figurami. Ten grajaŕ dobydnjo, ako dojśpijo w casu jadneje rundy (w normalnem paźe pěś minutow) wěcej dypkow.

Set togo graśa pasujo do mejtaŕ dłujkego kofera, wažy jadnab 3,5 kilogramow a dajo se wjelgin lažko transportěrowaś a natwariś.

Wuwijał jo se blidowy hokej we wšakich wariantach wót srjejźi 20. stolěśa, wósebnje woblubowany w krajach, ako su znate za kulturu lodohokeja, na pśikład w Českej, w Kanaźe a w Rusojskej. Teke w Nimskej eksistěrujo zwězk za blidowy hokej, kenž jo pódrědowany wjelikej mjazynarodnej federaciji.