Z Města/Cottbus. Město Chóśebuz pomina, až stupnica za ryby dej se twariś na drugem městnje, ako jo rowno planowane. To jo se tematizěrowało slědny tyźeń stwórtk pśi casnikaŕskem terminje pśi małej sprjewinej gaśeńskej muri w Žandowje. Na tom městnje ga dej stupnica za ryby nastaś. To teke pomina směrnica Europskeje unije. Stwórtk su informěrowali, až pśicyna aktualnego waźenja njejo, lěc taki załožk dej nastaś, ale źo. Krajny wobswětowy amt co jen na lěwem boce rěki natwariś, źož wobceŕk pomnika by se wobškóźeł a źěl pśirody by wordował betonowe twarjenje. Zastojnstwo města Chóśebuz a jogo partnarje kśě, až stupnica se twari na pšawem boce Sprjewje, źož teke twaŕske mašiny mógu lěpjej dojěś na twaŕnišćo. Wobydlaŕske towaristwo žycy se teke, až se pśiroda tak daloko ak móžno zdźaržyjo. Drugi dypk waźenja jo wjelikosć załožka. Ta jo wótwisna wót wjelikosći rybow. Ako pśikład wzeju tuchylu soma (Wels). Ten pak njejo žywy na tych městnach Sprjewje a dla togo njejo notne taku wjeliku stupnicu twariś. Lěpjej by było, barbu (Barbe) ako pśikład wześ.