Dobry źeń! Kněni Piaterowa, Wy sćo wót aktualnego zymskego semestra, to groni wót łońskego oktobra, studentka we masterowem studiumje dolnoserbšćiny za wótnabocnikow na Lipšćańskej uniwersiśe. Pšosym pśedstajśo se raz!

Mójo mě jo Marilyn Piaterowa, som 45 lět stara a pśiźom z Chóśebuza. Som se how naroźiła a wótrosła. Som how šulu wuchójźiła, mójo wukubłanje absolwěrowała, móju abituru na drugej kubłańskej droze nachwatała. Wuspěšnje som socialnu pedagogiku studěrowała a som startowała do pówołańskego žywjenja. Mjazy drugim som statkowała w socialnopedagogiskej familijowej pomocy, som źěłała z dłujkocasnymi bźezdźěłabnymi a w młoźinskem amśe. Pón som teke źěłała ako wótkubłaŕka we wšakorakich źiśownjach, nježli až jo mója droga ako ceptaŕka pśez nabocny pśistup (Seiteneinstieg) do šule wjadła. Něnto som južo pśisamem pěś lět na Centrumje wušego schójźeńka Chóśebuz (Oberstufenzentrum Cottbus, OSZ) ceptaŕka we wótźělenju socialnistwo (Sozialwesen), głownje we wukubłanju wótkubłaŕkow a wótkubłarjow.