W Casniku móžomy cesto cytaś, kak pozitiwnje se wuwija statkowanje Domowiny w Dolnej Łužycy. Stupajuce licby su derje. Na drugem boku pak rědko wó tom powědamy, lěc to teke groni, až dostanjomy wěcej aktiwnych Serbowkow a Serbow za serbsku towarišnosć. W zachadnosći smy dožywili, kak śěžko jo, dosć luźi za wšykne gremiumowe funkcije namakaś. Teke wěcej kandiděrujucych ako městna měś by rědnje było, dokulaž demokratija jo žywa, gaž móžoš wuzwóliś. A how pśiźomy teke zasej k wšakim centralnym wupominanjam: W župnych wustawkach stoj, až głowna zgromaźina wuzwólijo županku abo župana ako pśedsedaŕku resp. pśedsedarja towaristwa. Smy to tencas raz tak změnili, až njedajo wěcej wjelike pśechwatanja za cłonki, ako z mójim wuzwólowanim ako župan 2013. A něnto wušej źaseś lět pózdźej głowna zgromaźina ignorěrujo swóje wustawki a župne pśedsedaŕstwo wuzwólijo župana. Pragmatiski to jo, pšawniski pšawje to njejo. Tak dokradnje to pak teke njamóžomy wěźeś, dokulaž aktualne wustawki župy rowno njejsu zjawnj pśistupne. Nanejmjenjej nic na župnem internetowem boku.