Z Města/Cottbus. „Chto co zgromadnje z nami Schadowanku 2025 planowaś?“ To jo pšašała Załožba za serbski lud (glej NC9/2025) a jo pšosyła wałtoru, 4. měrca, wšych, ako su zwólniwe, se do togo nadawka daś, do klubownje Serbskego doma w Měsće na prědne źěłowe wobradowanje. Su se wjaselili, až jadnab sedym luźi ze serbskego swěta – ze wšakorakich institucijow – jo tomu pśepšosenju slědowało. Tak jadna se pla togo teama wó „rědnu měšańcu“, ako jo zgónił Nowy Casnik wót Susann Lichnokoweje, kótaraž ma marketing a zjawnostne źěło Załožby za serbski lud na starosći. „Smy pytali prědne ideje a kóńc měrca comy se drugi raz zmakaś“, wóna groni. Nejpjerwjej jo to zachopjeńk a hyšći jo wjele wótwórjone, na pśikład teke njejo se hyšći městnosć lětosneje dolnołužyskeje Schadowanki wustajiła. Wšo musy kšac pó kšacu konkretnu formu nabywaś – ale až to buźo, toś jo Susann Lichnokowa optimistiska. Až dajo něnto motiwěrowany team, kenž to gromaźe ze załožbu do ruki wzejo, jo za to ten wjele lubjecy zakład.